Narón é un dos 10 municipios máis poboados de Galicia, con preto de 36.000 habitantes que se distribúen entre os seis barrios que compoñen o centro urbano e as sete parroquias da zona rural. Situado na Terra de Trasancos coruñesa, cunha extensión de 66,2 Km², o seu contorno dota ao territorio naronés dunhas características climáticas de tipo oceánico, suaves e con temperaturas pouco extremadas.

A localización de Narón no noroeste galego dificultou históricamente o seu acceso desde outros lugares do país. Na actualidade o término municipal ten conexións coa autoestrada AP-9 e e autovía A-64 Ferrol-Vilalba. A posibilidade de opcións como o tren da costa e a proximidade dos aeroportos da Coruña e Santiago fan do noso Concello un destino ben comunicado.

As fotografías que aquí amosamos son unha chamada para tódalas persoas que visiten o noso municipio e que poderán disfrutar de variadas rotas turísticas que percorren o término municipal e que descubren fermosos recantos como o Mosteiro de S. Martiño no Couto ou o Muíño de Xuvia.

Da súa beleza paisaxística temos que salientar a riqueza das festas e tradicións que durante todo o ano se desenvolven en Narón, e que veñen enriquecidas polo feito de contar cunha historia de seu que medra día a día.